Këshilli i Lartë i Drejtësisë ka vendosur që të pezullojë nga detyra gjyqtarin Shkëlqim Miri, i cili akuzohet për tjetërsim të një vendim duke liruar një person nga burgu. Ky vendim u mor nga KLD në mbledhjen e fundit.
Gjyqtari Miri u arrestua pak ditë më parë, ku Gjykata e Krimeve të Rënda vendosi masën “Arrest me burg”. Arrestimi i tij erdhi pasi dyshohet se ka marrë ryshfet me 20 mijë euro për ndryshimin e akuzës ndaj Gentian Dodës, duke sjellë lirimin e tij nga burgu.
Ndërsa gjatë një kontrolli në banesën e tij, Mirit iu gjetën dhe sekuestruan 34 milionë lekë. Lidhur më këtë shumë parash, ai deklaroi se i kishte për kurim.
Ngjarja:
Gjyqtari i Apelit Shkëlqim Miri akuzohet se ka marrë një shumë parash për të lënë në fuqi vendimin e dënimit që favorizonte një të dënuar për vrasje, Gentian Dodën, të cilit i ishte ndryshuar akuza nga vrasje në plagosje të rëndë me dashje.
Dy persona kanë kryer rolin e sekserëve për paratë që dyshohet se ka marrë Miri në këmbim të votës pro lënies në fuqi të një vendimi të Gjykatës së Matit, që i kualifikonte veprën të akuzuarit Gentian Doda, nga “Vrasje me paramendim” në “Plagosje të rëndë me dashje, me pasojë vdekjen”.
Sekserët janë identifikuar si shtetasit Alban Buçi dhe Kujtim Miri. Ky i fundit është djali i xhaxhait të Shkëlqim Mirit, ndërsa Alban Buçi është njeri i afërt me të akuzuarin Gentian Doda.
Ata kanë ndërmjetësuar dhe kanë qenë pjesë e takimeve ku është konsumuar vepra penale e “korrupsionit”. Hetimet për Shkëlqim Mirin kanë nisur në janar të këtij viti, pas informacioneve se gjykatat shqiptare po kryenin manovra për t’i dhënë liri të akuzuarit për dy vrasje, Gentian Dodës.
