Italia nis hetimet për ti “prerë kokën” agjentit që po zhvat klubet

Superagjenti Mino Raiola është pranë telasheve të mëdha. Federata Italiane e Futbollit ka nisur një hetim për veprimet e menaxherit kohët e fundit duke hedhur dyshime mbi kontratat që ka firmosur. Raiola i kishte shpallur “luftë” sistemit të futbollit në Itali, pasi Mario Balotelli që është nën menaxhimin e tij nuk u grumbullua në kombëtare. Por edhe për kontratën e Gianluigi Donnarumma me Milan.Lajmin e ka bërë të ditur “Fatto Quotidiano”, që shkruan se organi i prokurorisë sportive pranë “FIGC” ka nis një hetim me akuzën e shkeljes së kodit të sjelljes dhe drejtësisë sportive. Raiola rrezikon një gjobë të majme në rastin më të mirë, ndërsa nëse shpallet fajtor për të tre akuzat, atëherë mund të kemi edhe një pezullim deri në pesë vjet nga aktiviteti me ekipet italiane. Në ditët e ardhshme do të mësohet më shumë.Raiola është akuzuar shpesh për veprimet që bën me kontratat dhe shumat e majme që fiton nga ato. Presidenti i FIFA-s, Giani Infantino vetëm pak muaj më parë shpalosi reformën e re të merkatos, ku do të synohej që paratë të mos dalin jashtë futbolli dhe të mos mbusheshin xhepat e agjentëve si ç’po ndodh tani. Duket se i pari që do të preket nga kjo reformë do të jetë Raiola, agjenti që ka nën vete lojtarë mjaft të mirë, por që shumë klube nuk i kontaktojnë për shkak të kushteve të kontratave që kërkon agjenti.