Ministri i Jashtëm italian, Angelino Alfano është shumë i shqetësuar për situatën në Ballkan. Për shkak të marrëdhënieve të tensionuara midis vendeve, Alfano do të zhvillojë një takim me ministrave e Jashtëm të Ballkanit në 27 maj.
Në Ballkan ka shenja të përkeqësimit të marrëdhënieve midis vendeve. Është ky alarmi që jep ministri i Jashtëm italian, Angelino Alfano teksa ka njoftuar se pikërisht për shkak të këtyre tensioneve do të zhvillojë një takim të ministrave të Jashtëm të Ballkanit në 27 maj. “Zhvillimet shqetësuese në Maqedoni dhe kriza e zgjatur politike në Shqipëri janë shenja serioze të përkeqësimit të marrëdhënieve ndërmjet vendeve të Ballkanit Perendimor”- deklaroi Alfano.
“Një nga zonat ku kohët e fundit kemi intensifikuar kontrollin dhe vëmendjen është gadishulli i Ballkanit. Gjatë ditëve të fundit, veçanërisht( dhe këtu mendoj për zhvillimet në Maqedoni dhe krizën politike në Shqipëri), janë regjistruar sinjale të forta të mosmarrëveshjeve mes vendeve të Ballkanit Perëndimor.
Alfano theksoi se në këtë fazë BE duhet të ndalet tek perspektiva e integrimit evropian të vendeve të Ballkanit Perëndimor. “Duhet t’i ndihmojmë këto vende në mënyrë që ato të çojnë përpara procesin e integrimit rajonal”-shtoi ministri i jashtëm Italian. Sipas tij, kohët e fundit në Ballkan është shënuar rigjallërim i retorikës nacionaliste dhe euroskepticizmit, me një ndikim negativ jo vetëm në dinamikën e brendshme politike, por edhe në marrëdhëniet ndërshtetërore në rajon.
