Komuna e Tetovës ka shpallur qytetar nderi shkrimtarin e madh Ismail Kadare. Me këtë rast shkrimtari i madh tha se ndjehet i vlerësuar për këtë akt nga komuna e Tetovës, duke shtuar se e ka të vështirë të flas para lexuesve në një prej qyteteve iliro-shqiptare. Megjithatë theksoi se çdo shkrimtar, sado i njohur që të jetë në botë dhe vendin e tij, ëndërron për çaste të tilla.
“Nuk e kam lehtë të flas para jush, jo se nuk e di të them fjalë, por se çaste të tilla janë të rralla në jetën e shkrimtarëve, të jetë përpara lexuesve një prej qyteteve iliro-shqiptare.
Këto janë çaste që çdo shkrimtar në botë ëndërron t’i përjetojë, pasi jeta njerëzore ushqehet nga ngjarje të këtilla. Iu falenderoj të gjithëve që erdhët në këtë sallë për të më takuar.
Unë kur dëgjoj fjalët tuaja për atë që kam shkruar, harroj çdo mundim që kam përjetuar. Nuk ka vlerësim më të madh për mua, kur njerëzit presin të dëgjojnë nga shkrimtarët diçka më tepër”, tha Ismail Kadare.
Në 28 tetor, këshilltarët unanimisht votuan pro këtij vendimi që shkrimtari i madh të jetë “Qytetar Nderi” i Tetovës. “Ndër pikat e seancës së katërt që u miratua ishte edhe pika që shkrimtari i njohur shqiptar dhe ndërkombëtar Ismail Kadare të shpallet Qytetar Nderi i Tetovës”, është shprehur Besar Durmishi, kryetar i Këshillit të Komunës në 28 tetor të këtij viti.
