“Po, ishte babi, unë e pashë”, këto jnë fjalët që djali 5-vjeçar i shqiptares Fjoralba Nonaj, e cila u vra nga burri i saj maroken në Itali, u tha mjekëve dhe psikologëve në spitalin Desio.
Krimi i rëndë ndodhi në sy të djalit të mitur, i cili tashmë është në gjendje shumë të rënduar psikologjike.
Viktima Fjoralba Nonaj 34 vjeç u godit disa herë me thikë nga bashkëshorti në sy të fëmijës së tyre 5-vjeçar. Prej disa muajsh çifti nuk jetonte bashkë për shkak se shqiptarja i kishte kërkuar divorcin. Kjo kërkesë e saj nuk pranohej nga burri maroken, i cili vazhdonte të kundërshtonte.
Krimi ndodhi në makinën e bashkëshortit të saj. Të tre; gruaja, burri dhe fëmija, ndodheshin brenda automjetit Chevrolet me ngjyrë të zezë. Pas debateve të shumta mes tyre, ai nxori thikën dhe e qëlloi disa herë rresht. Fjoralba u dërgua me urgjencë në spital, por nuk mundi të mbijetonte. Ajo kishte plagë të shumta në kraharor, në qafë dhe në shpinë. Ndërsa autori i krimit shkoi vet në polici dhe u arrestua. Ngjarja e rëndë ndodhi në Seregno në provincën e Monza-Brianza të Italisë.
