Ish-zonja e parë e Shteteve të Bashkuara, Michelle Obama, e cila është e martuar me ish-presidentin Barack Obama, si rrallë herë ka zbuluar se po vuan nga depresioni i nivelit të ulët. Kjo për shkak të gjendjes aktuale në të cilën ndodhet bota.
Michelle Obama tha se po përjeton ulje-ngritje emocionale për shkak të pandemisë së koronavirusit, dhe nga administrimi i situatës nga Donald Trump.
“E di që po luftoj me depresion të nivelit të ulët. Jo vetëm për shkak të karantinës, por për shkak të konflikteve racore dhe thjesht duke e parë këtë mënyrë administrimi, hipokrizinë e tij, nga njëra ditë në tjetrën, është dëshpëruese”.
Ajo po vuan nga pagjumësia dhe nga pamundësia për t’u marrë me aktivitet fizik për shkak të gjendjes mendore në të cilën është. Michelle Obama ka rrëfyer se zgjohet në mes të natës, pasi shumë gjëra e shqetësojnë.
“Zgjohem në mes të natës, sepse jam e shqetësuar për diçka ose ndjej sikur diçka më rëndon”. Ajo shtoi gjithashtu se “është rraskapitëse të zgjohesh me lajmin se një tjetër jetë e një personi me ngjyrë është marrë, ose në një mënyrë apo në një tjetër ky person mund të jetë lënduar, grabitur apo akuzuar për diçka”.
Ndaj personave që kanë probleme me depresionin, Michelle nuk nguroi që edhe të jepte këshilla.
“Ulje-ngritjet emocionale kërkojnë të njihni veten dhe gjërat që ju japin kënaqësi”.
