Ish-ministrja e Brendshme e Maqedonisë, Gordana Jankullovska, është dënuar me 6 vite burg.
Gjykata penale në Shkup i caktoi dënimin Jankullovskës, e cila e akuzohej për mënyrën e paligjshme të blerjes së një veture të tipit Mercedes, para gjashtë vjetësh.
Vendimi u mor nga këshilli gjyqësor prej pesë anëtarëve të kryesuar nga gjykatësja Dobrilla Kacarska.
Rasti u zbulua me publikimin e skandalit të përgjimeve para tre vjetësh.
Në bisedat telefonike, mes tjerësh dëgjoheshin ish-ministrja e rendit dhe ish-kryeministri Nikolla Gruevski duke biseduar për hollësitë se ç’duhej të përmbajë vetura Mercedes S 600 Guard, e blinduar, që do të përdorej për nevojat zyrtare dhe private të Gruevskit.
Në këtë proces qe favorizuar një kompani maqedonase, për ta sjellë në Shkup makinën nga prodhuesi gjerman. Mercedes Benzi kishte kushtuar 600 mijë euro, raporton VOA.
Prokuroria e posaçme, e cila ngriti akuzat kundër zonjës Jankullovska dhe pala mbrojtëse e saj kanë të drejtë për ankesa tek gjykata e shkallës më të lartë, Gjykata e Apelit.
Por, nëse nuk paraqiten ankesa, atëherë vendimi i gjykatës së shkallës së parë hyn në fuqi dhe ish-ministrja duhet ta vuajë dënimin prej gjashtë vjetësh. Ajo nuk ishte e pranishëm në seancën gjyqësore kur u dha verdikti.
Vetëm para tre ditësh, Gjykata e Apelit ia konfirmoi masën e dënimit prej dy vjetësh ish-kryeministrit Nikolla Gruevski të akuzuar për rastin, ndërsa ia uli nga 6 e gjysëm në 4 vjet e gjysëm ish ndihmës-ministrit Gjoko Popovski.
Procesi gjyqësor ndaj ish-ministres u desh të ndahej nga ai i dy të parëve për shkak të shtatzanisë së vlerësuar si të vështirë, nëpër të cilën po kalonte Jankullovska, shkruan VOA.
Ndërkaq, Gjykata Penale duhet të vendosë brenda pak orësh se si të veprojë deri në realizimin e masës së dhënë ndaj Gordana Jankullovskës, nëse do të mbahet në paraburgim apo arrest shtëpie, ose ndonjë masë më e lëhtë për shkak të faktit, që ajo vetëm para pak muajsh është bërë nënë.
