Futbolli në Shqipëri ka shumë probleme dhe këtë e vërteton edhe ish-lojtari i Tiranës dhe Flamurtarit, braziliani Jilberto Fortunato. Në një intervistë të dhënë së fundmi për “esporte.ig.com”, mbi eksperiencën e tij në kampionatin shqiptar, fjalët e brazilianit nuk kanë qenë aspak të mira. Aktualisht sulmuesi ndodhet në klubin e Feldës në Malajzi, por do të mbahet mend në Shqipëri, si njeriu i fundit që i ka dhënë derbin ekipit të Tiranës, në ndeshjet direkte ndaj Partizanit.
Jilberto është shprehur se Shqipëria është një vend më i varfër edhe se vendet aziatike. “Në Shqipëri shkova për të firmosur direkt kontratën, por më detyruan që të bëja dhe një provë. Ata gënjyen për kontratën, më dhanë vetëm gjysmën e parave që më premtuan.
Në termat financiarë, nga të gjitha vendet që kam luajtur, Shqipëria ka qenë më keq, gjithnjë të vononin pagat. Ishte një vend më i varfër se vendet aziatike. Gjithashtu kultura është pak a shumë e njejtë. Nuk kishte asnjë bonus për fitore, asnjë çmim të dhënë për lojën. Futbollistët vendast, ishin mësuar me realitetin dhe nuk ankoheshin për këtë situatë” – u shpreh Jilberto Fortunato.
