Kryefjala e merkatos në ditët e sotme, mbanë emrin e yllit brazilian Phelipe Coutinho. I cili është ndër më të kërkuarit në treg dhe Barcelona prej më shumë se një viti nuk po arrin të bindë Liverpoolin ta lejë të lirë edhe pse ka ofruar shuma të mëdha. Vlera e Coutinho tani arrin në 150 milionë euro, kur “The Reds” për ta sjellë në Angli kishin shpenzuar vetëm 18 milionë euro. Ishte Interi ekipi i parë i brazilianit në Evropë dhe ata e shitën pavarësisht formës së mirë dhe teknikës së lartë që kishte lojtari.
Në një intervistë për La Stampa ka folur edhe ish-drejtori teknik i Interit, Mario Branca. Ky i fundit ka hedhur poshtë fjalët që zikaltërit nuk besuan në talentin e Coutinhos dhe e arsyetoi në mënyrën se u shit për çështje financiare.
“Askush te Interi nuk ka dyshuar në kualitetin e tij, edhe pse kur vjen në Itali si 18 vjeçar është normale të kesh vështirësi. Real Madridi e kërkoi po ashtu, por ne kemi pasur fjalë me familjen e tij dhe në vitin 2010 ai na është bashkuar për më pak se katër milionë euro. A vlen 150 milionë euro? Nuk ka mënyrë për të matur tregun e transferimeve këto ditë, por kjo nuk vlen vetëm për Coutinhon, kjo vlen për të gjithë. Shuma të çmendura.
Them se ai është lojtar që mund të luaj në të gjitha pozicionet në sulm. Philippe ishte unik atëherë dhe sot, ai mund të shfrytëzojë të majtën ose të djathtën dhe nuk ka dallim këtu. Kur ai driblon, ai mund ta bëjë këtë në çdo situatë. Ajo që ne bëmë me Liverpoolin nuk ishte operacion teknik, ishte një çështje buxhetore dhe klubi tentoi t’i zgjidhte disa probleme. Kjo është arsyeja pse Coutinho u largua”, ka deklaruar Branca për La Stampa.
