Gjykata e Apelit për Krime të Rënda ka shpallur të pafajshëm ish-Drejtorin e Përgjithshëm të Burgjeve, Artur Zoto.
Në maj të këtij viti, ish-Drejtori i Burgjeve, Artur Zoto, u dënua nga Gjykata e Krimeve të Rënda me 5 vite burg.
Gjykata e Shkallës së Parë kishte vendosur masën “arrest me burg” për ish-zyrtarin e vënë në pranga nga policia, pas vendimit gjyqësor, ndërsa sot Gjykata e Apelit dhe e Krimeve të Rënda e shpalli të pafajshëm.
Artur Zoto u arrestua në shkurtin e vitit 2017-të, për skandalin e tenderit me ushqimet e të burgosurve, aferë korruptive për të cilën ka përfunduar në burg edhe ish-zëvendësdrejtori i Përgjithshëm i Burgjeve, Iliaz Labi. Vendimi është dhënë në një seancë që zgjati vetëm pak minuta, ndërsa të pranishëm kanë qenë dhe familjarë të Zotos.
Sipas avokatit të Zotos, ky ishte një vendim i pritshëm, pasi i gjithë procesi gjyqësor ishte bazuar mbi dëshminë e vartësit të ish-drejtuesit të burgjeve, Iliaz Labi.
