Ish-drejtoresha e Tatimeve, Briseida Shehaj, ka lëshuar një deklaratë të fortë në lidhje me çështjen e rafinerisë së Ballshit. E ftuar në Syri.net, Shehaj u shpreh se ajo është një kompani e privatizuar, por për shkak të detyrimeve ai aset i përkiste shtetit. Por është marrë padrejtësisht nga një bankë, për shkak të një ankandi të paligjshëm nga një kompani përmbarimore. Ajo ka deklaruar se disponon informacione, se si është abuzuar në atë rafineri, por nuk ka dhënë detaje të tjera.
“Deri në vitin 2013, kompania që e kishte në pronësi kishte detyrime ndaj nesh, bëmë marrëveshje dhe u shlyen detyrimet. Më vonë filluan problemet me atë uzinë. Ne iu drejtuam ministrit të Drejtësisë dhe është bërë një kallëzim penal në lidhje me kompaninë përmbarimore.
Ajo është një kompani e privatizuar, por për shkak të detyrimeve, ai aset i përkiste shtetit. Por ngrihet një kompani përmbarimore dhe e nxjerr në ankand, pa marrë parasysh detyrimet, dhe kompania i kalon një banke.
Sot Shqipëria është në një proces gjyqësor. Kam edhe unë informacione, por nuk do flas. Shteti duhet të bëhet pronar i saj, e ka shumë të thjeshtë t’i kthejë rafinerinë shqiptarëve”, tha Shehaj.
