Ish-deputeti Eduart Ndocaj, i njohur si deputeti kauboj ka zbuluar prapaskenat në politikën shqiptare.
Dikur në radhët e PS-së, e më pas në krah të të djathtëve, Ndocaj lëshoi deklarata të forta për një “bashkëpunim të fshehtë” apo “takime të fshehta” midis dy liderëve Basha dhe Rama, të njohur si dy “armiq të betuar” në politikë.
I ftuar në studion e “Ditë e Re” në Ora Neës Eduart Ndocaj tha:
“Basha dhe Rama duken si binjakë se janë edhe të dy të gjatë. Ata do dalin bashkë këto zgjedhje. Ndaj nuk besoj të bëj aleancë me asnjërin. Kujtoni se ata nuk bëjnë edhe takime të fshehta?! Si dashuria me shikim të parë janë të dy që kur ishte Luli në çadër. Iu dhimbs Ramës atëherë kur ishte Luli në çadër dhe kanë nisur bashkëpunimin. Nga ana tjetër opozita nuk po bën rolin e saj por bashkëpunon me qeverinë.”
Më tej, ish-deputeti bëri me dije se do të kandidojë në zgjedhjet e ardhshme vendore për kryetar bashkie në Lezhë dhe shpreson të fitojë, ndaj dhe intervistën e tij e mbylli me mesazhin drejtuar të gjithë elektoratit shqiptar:
“Mos votoni me ndjenjë partiake, por për fëmijët dhe familjet tuaja sepse vota është e shenjtë. Mos vrit veten me votën tënde, jepe aty ku mendon se kandidati është i denjë për të të drejtuar.”
