Teuta Krasniqi dhe Blero janë ndarë në mënyrë miqësore me njëri-tjetrin. Po kështu raportet mes tyre janë mjaft të mira për hir të vajzës, Tarës. Teuta zbuloi si është marrëdhënia me ish-bashkëshortin, ndërsa ishte e ftuar në emisionin “Rudina”. Ajo ka treguar se njerëzit nuk e besonin që ata mund të ndaheshin miqësisht, e në të njëjtën kohë e kanë gjykuar. Teuta Krasniqi ka rrëfyer se bashkëshorti i saj, Adonisi, e ka kuptuar që në fillim situatën në të cilën ajo ndodhet dhe prioritetin për Tarën. Më tej Teuta është shprehur se ka raport shumë të mirë edhe me bashkëshorten e Bleros, Afronën.
“Më kanë gjykuar, si është e mundur, pse ku ka në botë kështu… Më janë dukur budallallëqe gjykimet, sepse secili prind duhet të mendojë për të mirën e fëmijës. Sepse fëmija nuk ka faj. Nuk ka përse të vuajë pasojat e ndarjes.
Jemi treguar që në fillim të pjekur në këtë aspekt, sepse unë vazhdoj të kem prioritet mirëqenien, shëndetin e vajzave para vetes edhe para gjithçkaje. Unë kam një të mirë, që në momentin që ndihem rehat me veten, edhe në momentin që unë vendos për një gjë, edhe gjithë bota me u ngrit, me më thënë që nuk është mirë, nëse unë mendoj që është mirë dhe e vlerësoj, thjesht do të vazhdoj me timen”, është shprehur Teuta.
