Të tjera të dhëna kanë dalë në dritë lidhur me ngjarjen e e rëndë që tronditi Kavajën. Ish-bashkëshorti i Marsida Qatjas, ka deklaruar për “Panorama” se ai nuk ka patur njohje me protagonistët e ngjarjes, dhe se në atë kohë, fëmijët kanë qenë me të. Etmond Sinka, duke folur për ngjarjen tragjike ku mbeti i vrarë me armë zjarri 41-vjeçari Dritan Haxholli, dhe u plagos polici Bledar Toçi, tha se nuk ka njohje personale me ta.
Etmond Sinka, babai i dy fëmijëve, është shprehur se në momentin e ngjarjes, djali dhe vajza kanë qenë në shtëpinë e tij. Po kështu ai ka zbuluar se me Marsidën janë ndarë prej katër vitesh me marrëveshje, por vijojnë të ruajnë një raport të mirë mes tyre.
“Fëmijët për fat të mirë kanë qenë të dy me mua mbrëmë, në shtëpinë time, pasi më kishte ardhur edhe motra. Janë shqetësuar nga ngjarja, sidomos djali që është 14 vjeç, sepse shikon mediat, ndërsa vajza është 9 vjeçe dhe nuk e ka kuptuar çfarë ka ndodhur. Unë me Marsidën kemi raporte të mira, vazhdoj të flas edhe sot me familjarët e saj, ndërsa sa i takon jetës së saj, janë gjera personale”, u shpreh ai.
