Situata e krijuar pas Derbit të Italisë, mes Interit dhe Juventusit kanë kaluar kufijtë sportivë. Është pikërisht arbitri Daiele Orsato në qendër të kritikave, pasi provoi të vendosë drejtësi dhe në fund dështoi në menaxhimin e situatës. Pasi është rikthyer në shtëpinë e tij, ku jeton me familjen ka vënë re lëvizje të shumta në lagjen e tij dhe është dashur të njoftojë policinë, pasi është ndjerë i kërcënuar.
Për më tepër, mediat italiane raportojnë se telefoni i arbitrit është i shkëputur tashmë, pasi ka pasur një fluks të jashtëzakonshëm telefonatash me tone kërcënuese. “Fëmijët e mi janë shumë të shqetësuar. Dua vetëm të qetësohen ata, pasi është një situatë jo normale”, tha arbitri.
Ndërkohë, një tjetër emër i rëndësishëm i arbitrimit në Itali, Ish gjyqtari Graziano Cesari i ka dalë kundër Orsatos, duke thënë se e humbi kontrollin e ndeshjes. “Pas drejtimit spektakolar që bëri Rocchi në sfidën Juve-Napoli, edhe Orsato tentoi të bëjë të njëjtën gjë në Milano. Gjithsesi e humbi kontrollin e sfidës që në momentin që nxori jashtë Vecinon, pas minutës së 15’. Më pas gaboi thuajse gjithçka, ku natyrisht kartoni i kuq i munguar për Pjaniç, do t’i peshojë rëndë, pasi nuk veproi në një aksion të zhvilluar dy metra para syve të tij. Për mua meriton notën 2, për drejtimin që i bëri kësaj sfide”, tha Cesari.
