Iraku feston fitoren kundër ISIS. Në Bagdad u zhvillua një paradë ushtarake për të shënuar fitoren përfundimtare kundër ISIS-it pas një lufte trevjeçare.
Kryeministri irakian, Haider al-Abadi dhe komandantë të lartë të ushtrisë dhe të sigurisë ishin të pranishëm në këtë paradë të zhvilluar në qendër të kryeqytetit. Ajo u mbyll me fluturimin e avionëve.
Al-Abadi e deklaroi ditën e sotme si festë kombëtare. Dje, Al-Abadi njoftoi fundin e luftës së ndërmarrë që prej tre vitesh nga forcat qeveritare kundër grupit të Shtetit Islamik në Irak.
“Forcat tona kontrollojnë të gjithë kufirin irakiano-sirian dhe njoftoj fundin e luftës kundër ISIS-it”, theksoi ai pas hapjes së një konference të organizuar nga sindikata irakiane e gazetarëve.
“Armiku ynë kërkonte të vriste qytetërimin tonë, por ne kemi fituar në sajë të bashkimit dhe vendosmërisë tonë. Ne i mundëm në pak kohë”, shtoi ai.
Shteti Islamik pushtoi një të tretën e vendit në vitin 2014 gjatë një ofensive duke vënë në rrezik ekzistencën e shtetit irakian.
