Ipeshkvi i Rrëshenit, Gjergj Meta jep alarmin për gjendjen aktuale të shoqërisë sonë, teksa thotë se kromi, ashtu si droga po traumatizon një brez fëmijësh dhe të rinj, që do të jetë i plagosur në të ardhmen.
Duke iu referuar një reportazhi nga emisioni investigativ “Le Iene”, Meta bën thirrje që të gjithë ne të ulim armët e retorikë konfliktuale dhe të shkojmë drejt një aleance për të mirën e vendit dhe të fëmijëve tanë.
“Le Iene” ka qenë në Bulqizë, aty ku fëmijët shqiptarë 11-13 vjeç braktisin shkollën për të mbledhur krom, në mënyrë që të ndihmojnë familjet e tyre, të zhytura në skamje.
Pas publikimit të emisionit të dhimbshëm, ku shfaqen fëmijët pa fëmijëri dhe pamja e mjerimit që hasen sot në familjet shqiptare, ka reaguar edhe ipeshkvi Gjergj Meta në një editorial, ku shkruan ndër të tjera:
“Po u vjedhim të ardhmen atyre fëmijëve. Nuk u lejojmë të jetojnë bukurinë e lojës dhe të moshës së tyre. Ua mohojmë ditën për diell, me indiferencën tonë dhe me pafuqinë e një shteti për t’i dhënë fund kësaj skamje e për të kontrolluar shfrytëzimin e të miturve. Diku kromi e diku lëndët narkotike, po traumatizojnë një brez fëmijësh dhe të rinjsh që do të jetë i plagosur në të ardhmen.
Pamjet e përcjella nga Mediaset-i edhe njëherë na vënë përpara përgjegjësisë të gjithë neve. Nuk mund të fshihemi e nuk mund të drejtojmë gishtin vetëm në njërën anë. Duhet të gjithë bashkë, të ulim, e përsëris, të ulim e të dorëzojmë armët e retorikës konfliktuale që nuk po çon asgjëkundi e të shkojmë drejt një aleance për të mirën e vendit dhe të fëmijëve që janë e ardhmja e vendit”.
