Simone Inzaghi të shtunën pasdite do të zbarkojë në “San Siro” me djemtë e tij të ekipit të Lazios, për tu përballur me Interin. Për teknikun italian kjo është një sfidë mjaft decizive pasi është një përballje direkte me një konkurrent që lakmon zonën Champions. Në këtë përballje lacialët gjejnë një Inter të dobët në krizë rezultatesh, por që nuk duhet nënvlerësuar.
“Interi është ‘i plagosur’, por kjo nuk do të thotë që t’i nënvlerësojmë, sepse kanë shumë kampionë në fushë, të cilët mund të të ndëshkojnë në çdo moment. Është një sfidë mjaft e rëndësishme, përballë njërit prej rivalëve direkt për një vend në Champions, por jo vendimtare, pasi ka mbetur ende edhe faza e dytë për t’u diskutuar. Gjendja e futbollistëve është e mirë, përveç Caicedos, që pas dëmtimit me Fiorentinën, do të mungojë në këtë takim dhe mund të rikthehet vetëm pas mesit të janarit”, deklaroi Inzaghi.
Simone Inzaghi nuk i ka shpëtuar as pyetjeve mbi paraqitjet e portierit shqiptar, Thomas Strakosha, që është shpallur portieri i ri më i mirë në Europë. Tekniku bardhekaltër vlerësoi paraqitjet e tij, duke e cilësuar një garanci për skuadrën bardhekaltër.
“Strakoshën e njoh prej kohësh dhe forma e tij nuk më befason. Ai punon shumë çdo ditë dhe tani është shndërruar në një garanci për ne. Nëse dëshiron të luftosh për objektiva të rëndësishëm, atëherë të duhen profesionistë në çdo repart”, tha Inzaghi.
