Bulmeti i blerë në treg nuk është natyral, pasi ka përmbajtje të vajit të palmës.
Ky është konkluzioni i arritur pas një investigimi të bërë nga “Fiks Fare”. Kështu, 20 mostra – 16 prej të cilave ishin gjalpë dhe 4 të tjera djathë kaçkavall, u dërguan në institutin e vetëm të referencës dhe sigurisë ISUV.
Edhe pse në etiketa përbërja e tyre reklamohej si natyrale, në fakt rezultatet ishin shokuese, pasi vetëm 1 nga mostrat ishte brenda normave, ndërsa 19 mostrat e tjera kishin në përbërje 5-50% vaj palme.
Sipas të dhënave të AKU, vetëm gjatë 2016-s, në vendin tonë u importuan 3720 ton vaj palme. Aktualisht në Shqipëri janë 24 kompani që e sjellin produktin për qëllime tregtare, kryesisht për industrinë ushqimore të ëmbëlsirave.
Vaji i palmës klasifikohet si një produkt i dëmshëm për shëndetin e njeriut, ndërsa Fiks Fare bisedoi edhe me mjekët, të cilët bëjnë thirrje që qytetarët të tregojnë kujdes me produktet që çojnë në shtëpi.
Ndërkohë, për tregtarët përdorimi i vajit të palmës është mjaft i leverdishëm për industrinë ushqimore pasi produktet e prodhuara me këtë vaj ulin kostot e prodhimit dhe ruajnë në temperaturë ambienti për një kohë relativisht të gjatë prodhimet.
