Interi është duke kaluar një moment aspak të mirë në fundin e kampionatit, pasi kanë tre ndeshje pa arritur fitoren. Këto ndeshje kanë bërë që zikaltërit të humbin një mundësi të artë për të siguruar kualifikimin në Champions League dhe këtë e ka pranuar edhe trajneri, Luciano Spalletti.
Të martën Interi do të përballet me Cagliarin, si ndeshja e parë në javën e 33 të Serie A dhe një fitore do ti përmirësonte pozitat. Ajo që i ka munguar Interit në ndeshjet e fundit kanë qenë golat, pasi kanë dominuar në lojë dhe në raste por në fund janë mjaftuar me një pikë.
“Krijuam një avantazh të vogël që tani nuk e kemi më. Objektivi ynë i vetëm tani është fitorja e ndeshjeve të mbetura në mënyrë që të kualifikohemi në Champions League. Akoma po luajmë mirë, por golat bëjnë diferencën. Nëse shënon merr tre pikët. Nëse nuk shënon limitohesh në vetëm një pikë. Pres që të ecim para nga ana e karakterit.”
“Na kanë mbetur vetëm gjashtë ndeshje të gjithë duhet të gjejmë zgjidhje të reja. Gjithsesi dua të them se vetëm Juventus, Napoli dhe Lazio kanë shënuar më shumë se ne. Barazimi ndaj Atalanta-s? Kishte diçka që nuk shkonte në 20 minutat e para, por më pas rikuperuam. Roma? Ata do të luajnë në Champions League por kanë një kalendar më të mirë se ne. Përmbysja e tyre ndaj Barcelona-s i ka dhënë një motivim të madh,” shprehet Spalletti.
