Interi është rikthyer tek fitorja pas disa javësh ngërç. Zikaltërit e Spallettit kanë mposhtur me rezultatin e thellë 4-0 Cagliarin në “San Siro”, për të marrë vendin e tretë, ku aktualisht ka dy pikë më shumë se Roma dhe Lazio.
Inter pati fillimin e ëndërruar teksa e gjeti golin e avantazhit pas vetëm tre minutash lojë me anë të Cancelo, i cili tundi rrjetën direkt nga një goditje dënim, nga një pozicion shumë të prirët me portën.
Pjesa e dytë nisi ashtu si e para për zikaltërt, që shënuan që në minutën e katërt, këtë herë me kapitenin Mauro Icardi, për të cilin ishte goli i 25-të në Serie A, vetëm dy më pak se golashënuesi më i mirë Ciro Immobile.
Goditje përfundimtare Cagliari e mori kur u mbush një orë lojë, teksa Marcelo Brozovic “firmosi” golin e tretë për vendasit me një goditje të saktë nga hyrja e zonës.
Në minutën e fundit pati kohë edhe për golin e katërt të skuadrës së Spalleti, shënuar nga Ivan Perisic me goditje dënimi. Cagliari, që luajti një ndeshje shumë të dobët, mbetet në vendin e 14-të, pesë pikë mbi zonën e rënies nga kategoria.
