Interi ka harruar të fitojë, një gjë të tillë nuk e arrin dot edhe përballë një kundërshtari modest si SPAL. Zikaltërit ndalen në një barazim 1-1 në transfertën që në letër dukej e lehtë, por me çfarë u pa në fushë edhe barazimi ishte si një fitore. Të dy golat erdhën nga këmbët e lojtarëve të SPAL-it, duke bërë të qartë që Interi nuk ka më identitet në fushë dhe një shpirt krijues. Djemtë e Spallettit mund të cilësohen në një krizë totale, pasi është java e 7-të rresht që nuk fitojnë në kampionat dhe e 9 në të gjitha kompeticionet.
Autogolit të Vicarit në fillimin e pjesës së dytë që krijoi përshtypjen se Interi do rikthehej te fitorja iu kundërpërgjigj në fund Paloschi që i ardhur në fushë nga stoli i dha një pikë me shumë vlera skuadrës së Semplicit. 3 pikë është për momentin diferenca mes Interit të vendit të 4-t dhe Romës së vendit të 5-të që luan në mbrëmje ndaj Sampdorias por nëse vazhdon me këto ritme skuadra e Spallettit ka shumë gjasa që të mbetet jashtë zonës Champions.
