Interi mposhtet për të dytën herë radhazi dhe këtë herë është Sassuolo që i mposht me rezultatin minimal 1-0. Transfertë e vështirë për zikaltërit të cilët nuk kishin shije të mira në atë stadium në vitet e fundit. Në pjesën e parë të ndeshjes, Nerazzurrët ishin më të mirë duke arritur të krijojnë disa raste të mira për gol me anë të Milan Skriniar (8′), Ivan Perisic (25′) dhe Mauro Icardi, por në asnjërin rast nuk arritën golin. Atë që se bëri Interi e bënë vendasit, të cilët në rastin e parë shënuan për ta çuar ndeshjen në 1-0.
Ishte sulmuesi Diego Falcinelli, i cili shënoi një gol të bukur me kokë në minutën e 34-të, pasi u shërbye për mrekulli nga Matteo Politano dhe me këtë rezultat skuadrat shkuan në pushim. Edhe pjesa e dytë nisi furishëm për mysafirët, të cilët pas vetëm katër minutave lojë patën mundësi ta barazojnë rezultatin, por kapiteni Icardi nuk arrin të mposhtë Consiglin nga pika e bardhë e penalltisë.
Luciano Spalletti ndërhynë në formacion dhe hedh në sulm më shumë sulmues për të arritur tek goli, por fati nuk ishte me ta pasi shpërdorojnë një numër të pafund rastesh. Pas kësaj humbje, Interi mbetet në vendin e tretë me 40 pikë, ndërsa Sassuolo ngjitet në vendin e 14-të me 20 pikë. Në ndeshjen e ardhshme, zikaltërit presin në shtëpi Lazion, ndërsa Sassuolo udhëton drejt Romës.
