Inter ka mposhtur bindshëm Lazion me rezultatin 3-0 në “Olimpico” dhe e ka dominuar gjatë gjithë takimit. Një reagim fantastik nga zikaltërit pas humbjes që pësuan në Camp Nou ndaj Barcelonës vetëm pak ditë më parë. Me këtë fitore Zikaltrit kanë marrë vendin e dytë të renditjes së Serie A dhe ndodhen gjashtë pikë larg kryesuesve të Juve-s.
Ishte Icardi që kaloi Interin në avantazh në minutën e 28’, i gjendur shumë pranë portës ai e ka mjaft të lehtë të mposhte Strakoshën.
Goli i dha akoma më tepër vetëbesim miqve dhe pak përpara se të përfundonte pjesa e parë Brozovic dyfishon rezultatin me një goditje të bukur nga distanca.
Pas pushimit Inter nuk e uli ritmin, por as Lazio nuk ishte në ditën e tij më të mirë dhe nuk arriti të reagonte. Në minutën e 70’ erdhi goli i nokautit me anë të kapitenit Mauro Icardi i cili pas një lëvizjeje të bukure brenda zonës ka mposhtur për të dytën herë portierin e përfaqësueses shqiptare Strakosha. Sulmuesi argjentinas ka shënuar pesë gola nga gjashtë goditjet e fundit në kuadrat në Serie A, një vrasës i vërtet.
