Në korrik 2017 eksportet e mallrave arritën vlerën 25 miliard lekëve, duke u rritur me 9.7 %, në krahasim me të njëjtën periudhë të një viti më parë dhe me 9.4 %, në krahasim me qershorin e 2017-s.
Sipas raportit të tregtisë së jashtme të publikuar këtë të enjte nga Instituti i Statistikave, edhe importet e mallrave në korrik 2017 u rritën me 9.2 % në krahasim me një vit më parë, duke shënuar vlerën e 55 miliard lekëve. Ndërsa krahasuar me muajin qershor, importet në korrik u ulën me 3.7 %.
Defiçiti tregtar i këtij muaji është 30 miliard lekë, duke u rritur me 8.9 %, krahasuar me korrikun e 2016-s dhe duke u ulur me 12.3 %, në krahasim me qershorin e këtij viti.
Rritja vjetore e eksporteve prej 9.7 %, këtë muaj është ndikuar kryesisht nga grupet: “tekstile dhe këpucë” me +5.6 pikë përqindje, “materiale ndërtimi dhe metale” me +3.6 pikë përqindje, “ushqime, pije, duhan” me +3.3 pikë përqindje. Grupi që ka ndikuar negativisht në ndryshimin vjetor të eksporteve, është “minerale, lëndë djegëse, energji elektrike” me -5.9 pikë përqindje.
Sipas INSTAT-it rritja vjetore e importeve prej 9.2 %, këtë muaj është ndikuar kryesisht nga grupet “materiale ndërtimi dhe matale” me +3.8 me pikë përqindje, “minerale, lëndë djegëse, energji elektrike” me +1.2 pikë përqindje,“tekstile dhe këpucë” me +1,2 pikë përqindje.
Ndërsa si periudhë 7-mujore (janar-korrik) eksportet e mallrave arritën vlerën 158 miliard lekë, duke u rritur me 12.9 %, krahasuar me një vit më parë, ndërsa importet e mallrave arritën vlerën 350 miliard lekë, duke u rritur me 6.3 %, krahasuar me një vit më parë.
Defiçiti tregtar gjatë 7 muajve të parë të vitit arriti vlerën 192 miliard lekë, duke u rritur me 1.4 %, krahasuar me 2016-ën
