Ish-ministri i Brendshëm, Saimir Tahiri, pret që Prokuroria të nisë hetim për nxjerrje sekreti dhe për dosjen e tij, pak javë pasi Prokuroria nisi hetimin për nxjerrje sekreti për dosjen 339 të përgjimeve.
“Prokuroria reagoi javët e fundit për nxjerrje sekreti. Unë pres që të vënë në hetim dhe ata që kanë nxjerr sekretin hetimor për rastin tim. Në këtë vend që jemi ne, nuk ka njeri që kalon pa marrë faturën”, tha Tahiri.
Më tej ai iu drejtua gazetares Klodiana Lala: “Inshallah nuk je vënë në hetim”.
Gazetarja nuk vonoi ti kundërpërgjigjej: “Ai rekurs nuk më shqetëson z. Tahiri”.
Kujtojmë që gazetarja Klodiana Lala është autorja e një materiali të përgatitur nga Rrjeti Ballkanik i Gazetarisë Investigative, BIRN dhe i publikuar nga Zëri i Amerikës për blerjen e votave gjatë zgjedhjeve në Dibër, Lezhë, Kavajë dhe Durrës.
Organi i akuzës e zhvilloi seancën me dyer të mbyllura, për shkak të sekretit hetimor, por ish-ministri Tahiri nuk ka qenë dakord, ku tha se Prokuroria ka “trafikuar” lajme të pafundme mbi rastin e tij. Ish-ministri i Brendshëm ka qenë i shoqëruar nga avokati i tij, Maks Haxhia.
Tahiri akuzohet se ka bashkëpunuar me grupin e Habilajve për ‘trafikim të lëndëve narkotike’ dhe ‘shpërdorim detyre’. Më 17 Janar të këtij viti, Prokuroria e Krimeve të Rënda njoftoi se do të zgjasë edhe me tre muaj afatet e hetimit për ish-ministrin Saimir Tahiri.
Shkak për zgjatjen e hetimeve është bërë letër-porosia që autoritetet shqiptare i kanë dërguar Malit të Zi dhe Catanias. Përgjigjia ende nuk ka ardhur dhe dosja nuk mund të dërgohet për gjykim nëse nuk ka përfunduar procesi i hetimit.
