Varianti i ri i koronavirusit në Indi, i raportuar fillimisht në këtë shtet në muajin mars, mund të jetë i lidhur me valën vdekjeprurëse të pandemisë.
Mostrat me mutacionin e dyfishtë janë identifikuar në disa rajone të Indisë, ku janë raportuar shifra rekorde të infektimit.
Në 24 orët e fundit, India ka raportuar një rekord prej 412,000 rasteve, bashkë me 3,980 viktima.
Duke folur në një konferencë për media nga Ministria e Shëndetësisë, eksperti K Vijay Raghavan ka pranuar se ekspertët nuk e kanë parashikuar ashpërsinë e rritjes së numrit të rasteve, shkruan India Tv News.
“Faza e tretë është e pashmangshme, marrë parasysh nivelet e larta të qarkullimit të virusit. Mirëpo nuk është e qartë se në çfarë shkalle do të ndodhë kjo valë. Ne duhet të jemi të përgatitur për valë të reja”, u shpreh ai.
Vala aktuale e pandemisë ka vështirësuar rëndë punën e sistemit shëndetësor, pasi ka mungesë të shtretërve, oksigjenit dhe nuk ka hapësirë për krematoriume.
