Jo gjithçka ka shkuar mirë të martën që u hodh edhe shorti për fazën e grupeve në Champions League. Fillimisht kishte polemika për lojtarin më të mirë të vitit, që u shpall Modric dhe jo Cristiano Ronaldo. Kjo bëri që të kishte reagime nga agjenti i yllit portugez, Jorge Mendes, por edhe nga drejtori sportiv i Juventusit, Marotta.
Por ka pasur edhe një moment aspak të këndshëm mes Salah dhe Sergio Ramos. Egjiptiani duket se nuk ia ka falur Ramosit atë dëmtim në finalen e Champions Leagues, pavarësisht shtrëngimit të duarve që patën në fushën e blertë.
Salah qëndroi i ftohte gjatë gjithë ceremonisë dhe e evitoi Sergio Ramosin, të cilit nuk kishte dëshirë që ti jepte as dorën. Pasi zbriti nga podiumi me çmimin e “mbrojtësit më të mirë” të Championsit të kaluar, spanjolli i Realit mendoi të “përshëndeste” egjiptianin që ishte ulur në radhën e parë, me një prekje në shpatull, e interpretuar nga shumëkush si provokim.
Një gjest që nuk u vlerësua as nga Salah, i cili mbeti totalisht pasiv. Episodi po bën xhirot e rrjeteve sociale dhe medieve sportive në botë.
