Vijon protesta e studentëve në ditën e 13-të, tashmë të vendosur para Kryeministrisë. Studentë të shumtë nga Tirana, por edhe nga rrethet qëndrojnë para Kryeministrisë, ku kërkojnë plotësimin e 8 kërkesave.
Studentë të shumtë kanë hipur në podium duke folur e treguar vendosmëri në kërkesat e tyre. Por në një moment ka pasur një incident të vogël, teksa 3 persona të maskuar me shall kanë hedhur tymuese mes turmës në drejtim të Kryeministrisë.
Megjithatë, ky veprim nuk ka gjetur mbështetje nga protestuesit e tjerë, të cilët kanë bërë thirrje që personat në fjalë që hodhën tymuese të largohen.
“Largohu ti aty, o zotëri largohu. Ik që këtej. S’ka tymuese këtu”, tha studenti.
Ndërkohë një tjetër shtoi: “Kemi ardhur këtu si studentë, kemi kulturë. Nuk protestojmë në mënyrë të turpshme. Nëse është dikush që do të përdorë dhunë në emrin tonë, turp, turp. Kemi ardhur këtu për kërkesa tona, për arsimin. Ne nuk ushtrojmë dhunë”.
