Deklarata e Ramush Haradinajt se Thaçi dhe Rama i kanë bërë presion në sy të ndërkombëtarëve për heqjen e taksës ndaj mallrave serbe, ka bërë bujë të madhe.
Tashmë, është ministri i Punëve të Jashtme, Behgjet Pacolli ai që ka treguar se çfarë ka ndodhur gjatë pushimit në Samitin e Berlinit kur Macron e Merkel kanë biseduar me liderët kosovarë dhe Edi Ramën.
Pacolli ka thënë se në të vërtetë ka pasur presione që taksa të hiqet. Ministri tha se fillimisht kërkesën e ka bërë ambasadori amerikan, i cili ka thënë që taksa të pezullohet për dy javë.
Ai më pas ka thënë se edhe Merkel ka kërkuar pezullimin e taksës dhe të shihet nëse dialogu shkon në rrugën e duhur.
“Ne patëm një koktej dhe aty filloi presioni, fillimisht kryeministrit që duhet të hiqet taksa dhe të vazhdojë dialogu. Kush iu ka afrua atij i ka kërkuar pezullim të taksës. Pezullim për dy javë i taksës është kërkuar edhe nga ambasadori i SHBA-së. Normalisht Haradinaj thotë se taksa nuk hiqet dhe ky presion vazhdon te vendet e Ballkanit Perëndimor. Më vonë këshillat e Merkel kanë qenë që suspendoni këtë taksë dhe i definojmë gjërat si ndodhin. Nëse nuk ndodhin siç parashihet, jeni i legjitimuar për ta vënë përsëri taksën. Pason edhe propozimi i presidentit Macron, e njëjta retorikë”, ka thënë Pacolli.
