Në 25-vjetorin e themelimit të “Kastrati Group” u inaugurua qendra e Mercedez Benz. I pranishëm në këtë aktivitet, kryetari i Bashkisë Erion Veliaj theksoi se me këtë qendër, është bërë e mundur hapja e 250 vendeve të reja pune. Kjo tregon sipas tij, se nxitja dhe zhvillimi i bizneseve mund të bëjë të mundur rritjen e ekonomisë së vendit.
Sipas Veliajt, ashtu si në fushën e politikës, ku mazhoranca dhe opozita arritën në një marrëveshje për të zgjidhur krizën politike, ashtu edhe bizneset nëse punojnë së bashku mund të rrisin zhvillimin ekonomik.
“Sot “Mercedez Benz” njihet ndoshta si “brandi” më i njohur në të gjithë botën. Kjo qendër do të krijojë vende të reja pune. Do të punësojë 250 njerëz. Këta 250 persona do të jetojnë me punë të ndershme dhe do të marrin një pagë të ndershme. Kjo është edhe merita e arsimit profesional. Gjithashtu, edhe politika është mbledhur sot për të marrë disa vendime të rëndësishme për ekonominë e vendit. Kjo tregon se nëse jemi të gjithë bashkë mund të ndryshojmë shumë gjëra dhe të rrisim mirëqenien ekonomike”, u shpreh Veliaj.
Ndërsa, përfaqësuesi gjerman i “Mercedez Benz”, Kullik, theksoi se Shqipëria është zhvilluar në drejtim të infrastrukturës. Ai vuri në dukje se sistemet tashmë janë modernizuar, duke kërkuar edhe punonjës të kualifikuar.
“Kastrati Group ka treguar besim dhe guxim në zhvillimin në infrastrukturës shqiptare. Suksesi i kësaj ndërmarrje ka dhënë një shtysë të madhe për të ardhmen. Sistemet gjithnjë e të modernizuara kërkojnë një trajnim të kualifikuar të personelit. Më parë mjaftonin pak njohuri të thjeshta, por atëherë mund të kishe njerëz me muskuj të fortë por me inteligjencë të dobët. Tani kjo nuk mjafton më. Pjesa teknike këtu është e përgatitur më së miri. Ne jemi të sigurt se kjo kompani do të përmbushë klientët e sotshëm, por edhe në të ardhmen. Kushtet janë krijuar në mënyrën e duhur. Klienti është mbreti dhe këtu ai do të drejtohet si i tillë. Dëshiroj që t’iu uroj drejtuesve të kësaj kompanie, një hap papara, por një hap konkurrence”, theksoi Kullik.
