Aktori Arben Imami tha sot se është një turp i madh kur ju tregojmë kolegëve fqinj ambientet ku punojmë. Deklaratat Imami i bëri në takim me ministren Mirela Kumbaro. Një grup artistësh kanë shkuar sot në Ministrinë e Kulturës. Grupi i artistëve u ftua nga ministrja për të gjitha problemet në Teatër, shpërnguljen në një tjetër ambient, si dhe zhvendosjen e artistëve të Operas për të dhënë shfaqje në Teatrin Kombëtar.
Por një pjesë tjetër aktorësh, mes tyre Arben Derhemi dhe Ema Andrea janë mbledhur në sallën e Teatrit Kombëtar.
“Ndoshta protestimi po bëhet në mënyrë të pa edukuar. Nëse do vijë dhe opera të japë shfaqje janë mëse të mirëpritur që të vijnë të japin shfaqje, edhe ata janë kolegët tanë. Kur na vijnë miq nga vendet fqinje i presim shume mirë deri në oborrin e teatrit, por është turp kur i fusim ata brenda. Aq më shumë po t’i tregojmë ambientet e teatrit aq me tepër tualetet dhe shohin vendin ku ne punojmë. Aktorëve iu ka ardhur në majë të hundës me këtë gjendje. Vendosni një datë kur do fillojë ai projekti për teatrin e ri”, deklaroi Imami.
