Karriera e Igli Tares si drejtor sportiv vjen vetëm në rritje. Ekipi i Napolit kërkon që të afrojë shqiptarin në gjirin e saj dhe e sheh si njeriun që do të bëjë të mundur shpalljen e tyre kampion të Serie A. Edhe pse akoma nuk është mbyllur përfundimisht çështja titull, të paktën matematikisht, napolitanët duket se po përgatisin një revolucion të gjerë. Me Sarrin dhe Koulibalyn që kanë një interesim të lartë nga Anglia, Reaina që ka firmosur me Milanin pritet që edhe emra të tjerë të mëdhenj të largohen.
Gjithsesi, ndryshimet më të rëndësishme pritet të jenë ato në pozicione drejtuese, ashtu si rasti i drejtorit sportiv, Cristiano Giuntoli, për të cilin ende nuk ka rinovim të kontratës. Në rast të largimit të drejtuesit, presidenti Aurelio De Laurentiis dëshiron të afrojë te Napoli, Igli Taren.
Ish-kapiteni i Kombëtares, që në vitet e fundit është vlerësuar si drejtori sportiv më i mirë në Itali për goditjet e shkëlqyera në merkato, mund të jetë i lirë në qershor. Kontrata e tij me Lazion mbyllet në fund të sezonit. De Laurentiis ka kontaktuar me Taren, që pasi ka treguar nuhatje të jashtëzakonshme në evidentimin e talenteve, cilësohet njeriu ideal për një piacë si Napoli. Filozofia e klubit me investime të rëndësishme dhe promovimin e yjeve të rinj i shkon për shtat ish-sulmuesit shqiptar, që për momentin mbetet maksimalisht i përqendruar te Lazio, por do ta kishte të vështirë të refuzonte një projekt ambicioz si ai i Napolit.
