Partia për Drejtësi dhe Unitet (PDIU), edhe pse do jetë pjesë në procesin e pritshëm zgjedhor, vlerëson se po shkohet në zgjedhje me parimin stalinist.
Kreu i saj Shpëtim Idrizi, tha sot gjatë një takimi me elektoratin e zonës 10 në Kryeqytet se, “këto janë zgjedhje të pazakonta, sepse gjysma e spektrit politik rrezikon që të mos marrë pjesë në to. Ne shkojmë në zgjedhje me parimin stalinist, ku populli voton dhe dy partitë e mëdha numërojnë”, theksoi ai.
Më tej në fjalën e tij, Idrizi huazoi shprehje të qëndrimit të opozitës, kur tha se, “iluministët e mëdhenj të kësaj bote luftuan kundër pushtetit absolut, që pushtetet të mos ishin të përqendruar në një ose disa njerëz, si këta që ne po shohim në Shqipëri”.
Idrizi u bëri thirrje qytetarëve të tregojnë dinjitet para kutive të votimit dhe të mos shesin verdiktin e tyre. “Vota nuk mund të transformohet në thasë mielli apo në para pasi kemi dinjitetin tonë si qytetarë dhe si shqiptarë”, shtoi ai.
Sipas tij, në vendin tonë ka ende shpresë për një të ardhme më të mirë, ndaj ftoi të gjithë shqiptarët që duan të largohen nga Shqipëria të bashkohen me PDIU-në në zgjedhjet 8 qershorit.
