Interi mposht Atalantën dhe merr vendin e dytë, falë një dygolëshi të kapitenit Icardi. Edhe pse ky i fundit vinte nga një dëmtim që nuk e lejoi ti bashkohet Argjentinës, Spalleti vendos ta hedhë në fushë nga fillimi i ndeshjes dhe Icardi ia shpërblen më së miri. Ndeshja ka qenë e dominuar plotësisht nga zikaltërit, të cilët kanë krijuar një ekip solid dhe konkurues këtë vit për kampionatin. Pjesa e parë përfundoi në barazim pa gola, ndërsa Interi vuajti shumë rreshtimin e Atalantës. Skuadra e Gasperinit mbyllte mirë hapësirat në mbrojtje dhe kundërsulmonte rrezikshëm. 2 ishin rastet më të pastra në këtë pjesë, ku Handanoviç ndali Hateboerin e Atalantës, ndërsa Berisha hipnotizoi kapitenin e Interit, Icardin.
Pjesa e dytë fillon nën ritme më të larta nga ana e Interi dhe Icardi zhbllokon rezultatin. Inter e nis vrullshëm pjesën e dytë dhe gjen golin në minutën e 51-të, me anë të të zakonshmit, kapitenit Icardi. Argjentinasi shfrytëzon një krosim të ardhur në zonë dhe ndëshkon me kokë Etrit Berishën.
9′ minuta më vonë është sërish Icardi dhe Inter dyfishon rezultatin. D’Ambrosio rrëmben një top në krah dhe kroson në zonë, aty ku argjentinasi shkëputet dhe ndëshkon sërish Berishën. Inter kryeson 2-0 dhe shkon i qetë drejt fitores.
Pjesa tjetër e ndeshjes kontrollohet mjaft mirë nga djemtë e Spalletit që nuk e lejojnë Atalantën të reagojë dhe janë sërish ata më pranë golit në minutat e fundit. Icardi është golashënuesi më i mirë i ekipit dhe ka barazuar Dybalan me 12 gola në këto 13 ndeshje të luajtura. Interi ia del të rimarrë sërish vendin e dytë, pas asaj disfate që pësuan kampionët e Juventusit përballë Sampdorias.
Formacionet zyrtare:
INTER (4-2-3-1): 1 Handanovic; 33 D’Ambrosio, 37 Skriniar, 25 Miranda, 21 Santon; 11 Vecino, 5 Gagliardini; 87 Candreva, 20 Borja Valero, 44 Perisic; 9 Icardi.
ATALANTA (3-4-3): 1 Berisha; 6 Palomino, 3 Toloi, 5 Masiello; 33 Hateboer, 4 Cristante, 15 De Roon, 21 Castagne; 72 Ilicic, 27 Kurtic, 10 Gomez.
