Ibrahimoviç e mbyll me Manchesterin dhe “braktis” Evropën

Zlatan Ibrahimovic i ka dhënë fund përfundimisht aventurës me ekipin e Manchester United, por edhe asaj europiane. Sulmuesi suedez ka nënshkruar kontratë me klubin amerikan të Los Angelos Galaxy, raporton e përditshmja “LA Time”.

Ibrahimoviç kohët e fundit ishte duke kaluar një periudhë të errët tek Djajtë, pasi po vuante shumë dëmtime dhe nuk ishte i përfshirë në skemat e Mourinhos. Kjo situatë ka detyruar suedezin që të kërkojë një aventurë të re, duke ditur që ekipi i LA kishte më shumë se një vit që kërkonte shërbimet e sulmuesit.

Marrëveshja pritet të zyrtarizohet nesër dhe futbollisti pritet të zbarkojë në Amerikë javën e ardhshme, të mërkurën ose të enjten. Ibrahimovic ka qenë duke rikuperuar nga një dëmtim, por sipas shtypit amerikan ai mund të jetë në dispozicion të skuadrës për derbin e 31 marsit që Galaxy do të luajë kundër Los Angeles FC.