Një shqiptar është plagosur me armë zjarri gjatë natës pranë banesës së tij në qytezën Oderzo (Treviso, Itali). Shqiptari i cili mbeti i plagosur është 40 vjeç me iniciale D.Q. dhe punon si truprojë në një kaziono. Ngjarja ka ndodhur rreth orës 3.40 në rrugën “Volta” pranë stacionit të autobusit, raporton “Corriere della Sera”.
Ndërsa kthehej në shtëpi, 40-vjeçari u përball me atentatorin i cili e priste i fshehur në errësirë. Ky i fundit, raportohet se e kishte fytyrën të maskuar dhe qëlloi me pistoletë ndaj 40-vjeçarit. “Corriere” raporton se një plumb e preku në shpatull, megjithatë D.Q. ndodhet jashtë rrezikut për jetën.
Ndihma mjekësore iu dha me një helikopter-ambulancë, që e transferoi në spitalin e Trevisos. Prokuroria ka hapur një dosje me akuzën e tentativës së vrasjes. Media italiane raporton se pista ku janë përqendruar hetuesit është ajo e pasionit. 40-vjeçari është kërcënuar edhe në të kaluarën.
