Milan u mund me rezultatin 3-1 në fushën e Olimpiacos, çka solli edhe eliminimin e kuqezinjve nga Europa League dhe grekët vijojnë për në fazën e 32 më të mirave.
Gjithsesi në fund të ndeshjes arbitri kryesor i ndeshjes u kryqëzua për atë penallti të dhënë, që të gjithë e quajtën të vjedhur. “Na eliminoi arbitri, me penalltinë e shpikur dhe vendime të tjera”, tha Leonardo pas eliminimit.
Ndërkohë në Milano, presidenti Paolo Scaroni ka rënë pre e një vjedhje. “TgCom” raporton se dy hajdutë i kanë marrë pronarit të Milan një valixhe me para në qendër të Milanos. Raportohet se në valixhe ka qenë një shumë prej 10 mijë euro dhe dokumente të kompanisë.
Mësohet se Scaroni ka dalë nga makina duke lënë valixhen brenda, aty ku ishte edhe shoferi i tij. Një hajdut ka shkuar e ka hapur makinën dhe ka marrë valixhen duke ia mbathur me vrap, shoferi është përpjekur ta ndjekë por ai është ndalur nga një person tjetër duke iu dhënë mundësi hajdutëve të largohen. Më pas valixhja u gjet e braktisur, në të ishin dokumentet por jo paratë.
