Ndeshja mes Juventusit dhe Milanit krijoi tensione e nervozizëm mes lojtarëve. Një nga momentet kyçe të ndeshjes, ishte nxjerrja e Higuain jashtë fushës së blertë me karton të kuq.
Mes tij dhe Cristiano Ronaldos, dikur shokë skuadre tek Real Madrid, pati një konfrontim. Pasi arbitri nxori kartonin e kuq për argjentinasin, ky i fundit shpërtheu në nerva dhe pati një përplasje fizike me Ronaldon, te cilin e shtyu.
Por, pas përfundimit të ndeshjes, portugezi ka sqaruar gjithçka. Ronaldo ka treguar se çfarë i tha kundërshtarit të tij.
“Unë i thashë vetëm që të mos e ekzagjeronte, për të mos rrezikuar një ndëshkim më të madh. Ai ishte nervoz, po humbte ndeshjen. Nuk duhet absolutisht t’i vëmë faj, unë nuk thashë asgjë”, e justifikoi ai Higuain, për t’u ndalur më pas e për të komentuar rezultatin e ndeshjes, duke vlerësuar kundërshtarin:
“Nuk është asnjëherë e thjeshtë të luash ndaj Milanit në “San Siro”. Kemi treguar superioritet, jemi me të vërtetë të lumtur. Është një fitore e rëndësishme. Jemi kthyer përsëri te 6 pikët diferencë nga Napoli. Jam i kënaqur sepse edhe ia dola të shënoja gol”.
