Tre vite më parë, Khaled Al-Suwaidi tashmë 35 vjeç, mori disa këshilla që e ndryshuan tërësisht jetën e tij. Ai u paralajmërua se mund të mos jetonte edhe për shumë gjatë.
Me origjinë nga Abu Dabi, Al-Suwaidi u lind dhe u edukua në Shtetet e Bashkuara. Ai studioi master dhe më pas bëri doktoraturën me shpresën e një profesioni akademik.
Por, gjatë kësaj periudhe intensive, Al-Suwaidi kishte një stil jetese aspak të shëndetshëm, pasi peshonte plot 127 kilogramë.
“Isha gjithnjë duke studiuar dhe kur nuk studioja, kisha dalë jashtë, duke shijuar kohën apo duke ngrënë vonë gjatë natës. Asnjëherë nuk mendova se sa gjatë do të jetoja”, tha ai.
Në vitin 2013, ai shkoi të jetojë në Abu Dabi dhe në vitin 2015, mori postin e drejtorit ekzekutiv të Qendrës së Emirateve për Studime dhe Kërkime Strategjike. Gjatë një check-upi me doktorin e tij, ai mori disa lajme befasuese.
“Në moshën 32-vjeçare, doktori më tha se do të bëhesha me diabet në muajt e ardhshëm. U shokova! Hapi i parë është të kuptosh se mund të ndryshosh dhe se kjo do të të marrë kohë. Më pas, shumë gjëra të mira nisin të ndodhin”.
Ai nisi të flejë herët, duke u kujdesur për sasinë dhe llojin e ushqimit që konsumon, dhe sigurisht duke u stërvitur. Ai u fokusua në konsumimin e madh të perimeve dhe frutave.
“Mora një vendim që më ndryshoi jetën për të humbur peshë. Por, në të njëjtën kohë, doja një ndryshim fizik”.
Dhe çfarë sfide ka qenë e gjitha kjo! 3 vite më vonë, Al-Suwaidi u bë personi i parë që vrapoi nonstop rreth Emirateve të Bashkuara Arabe për të shpërndarë vetëdije për kancerin. Ai shkoi nga Fujairah në Abu Dabi, 327 kilometra në 3 ditë e 8 orë.
I ati i tij është një person që ka mposhtur kancerin, gjë që e bëri atë më të fortë për të luftuar obezitetin e tij.
“Njëherë që fillova të humbisja peshë, kuptova që i kam në dorë vetë aftësitë e mia fizike. Nëse nuk përpiqem ta shtyj veten tani, do të jetë më e vështirë kur të plakem.”
Ai bëri një ndryshim total të dietës së tij, duke ngrënë shëndetshëm dhe duke u siguruar që të konsumojë produkte të pasura me vlera ushqyese.
“Kam mësuar shumë në këto 3 vite. Mendoj se jam në formën më të mirë të jetës tani”, tha Al-Suwaidi./ TIRANA TODAY
