Kryeministri Edi Rama ka kërkuar përjashtimin e deputetit të Partisë Socialiste në Kurbin, Gjetan Gjetani, pas kritikave që bëri ndaj Policisë së Shtetit.
Kreu i qeverisë e bëri këtë deklaratë gjatë fjalës së tij në Asamblenë e PS. Rama ka kritikuar edhe drejtuesit e Partisë Socialiste në rrethe, duke i quajtur ndërmjetës për punësime.
Kryeministri u shpreh se shumica e kryetarëve të partisë në rrethe kanë braktisur detyrën e tyre.
“Partia në territor është larg së qëni Partia Socialiste që duam, që kryen funksionet e patjetërsueshme të komunikimit me ata që na kanë besuar. Madje shumica e kryetarëve tanë në territor e kanë braktisur detyrën dhe janë kthyer në ndërmjetës për punësime“, thotë Kryeministri Edi Rama.
Përmes një statusi në faqen e tij zyrtare në “Facebook”, deputeti Gjetani përcolli shqetësimin për këtë ngjarje, ndërsa e cilësoi policinë e Kurbin një hallkë të paaftë dhe të korruptuar. Ai në fund ka paralajmëruar se do të kërkojë interpelancë në parlament për këtë ngjarje të rënd. Deputeti Gjetani paralajmëroi po ashtu se do të jetë ai i parë që do të ngrihet në protestë, ndërsa do t’iu bëjë thirrje banorëve t’i bashkohen atij.
“Ngjarjet e fundit të ndodhura në Kurbin më kanë shqetësuar shumë. Duke bërë që, në Kurbin të mos ndihemi të sigurt. Eksploziv, kërcënim me armë dhe vrasjen e dy të rinjve tregon që poliicia është hallkë shtetërore shumë e paaftë. Kjo tregon se në Kurbin kanë sjellë oficerë dhe drejtues policie të paaftë, të korruptuar dhe ordinerë. Si deputet I kësaj zone kam pasur ankesa të shumta nga qytetarët, të cilat do t’I bëj publike në Parlament. Brenda muajit shtator do kërkoj interpelancë me Ministrin e Brendshëm dhe në qoftë nuk do të marrë masa për pastrimin e komisariatit të policisë Kurbin, unë I pari do ngrihem në protestë, duke kërkuar mbështetjen e të gjithë qytetarëve të Kurbinit, pa marrë parasysh ngjyrat politike”, shkruante dje Gjetani.
