Legjenda e futbollit brazilian, Roberto Carlos ka fituar një çështje gjyqësore me gazetën e madhe britanike, Daily Mail. Kjo e fundit tashmë është e detyruar ti paguaj një dëmshpërblim të majmë për një artikull të shkruar një vit më parë, që rezultoi mashtrim.
Në qershor të vitit 2017, Daily Mail publikoi një artikull ku thuhej se Carlos kishte përdorur doping për të përmirësuar paraqitjet gjatë karrierës së tij, duke përfshirë këtu edhe Kupën e Botës të vitit 2002 të fituar nga Brazili. Ish-ylli i Real Madridit, e paditi median britanike javën e kaluar. Në një konferencë për media, avokati i tij, Andy Lee, tha se akuzat e Daily Mail kanë qenë të pabaza.
“Është një akuzë plotësisht e pasaktë dhe e pabazë. Carlos nuk e njeh dhe nuk e ka takuar asnjëherë mjekun Brazilian, i cili në artikull thuhet se i ka ndihmuar Carlosit të sigurojë dopingun,” u shpreh ai.
Të dielën, Daily Mail i kërkoi falje yllit Brazilian, duke e pranuar gabimin e bërë. Ata pranuan t’i paguajnë dëmshpërblim për “shqetësimin dhe turpin” që i ka shkaktuar artikulli. Megjithatë, ata thanë se akuzat janë bazuar në një dokumentar nga një televizion gjerman.
