Pas Sadiq Atanda, Partizani heq dorë edhe nga një tjetër lojtar që i ndihmoi për t’u shpallur kampion pas 26 vitesh. Ardit Hila nuk do të jetë pjesë e të kuqve duke nisur që prej ditës së sotme. Mesfushori duket se nuk u bind nga projekti i ofruar nga skuadra, duke zgjedhur që të largohet. Largimi i 25-vjeçarit është njoftuar në faqen zyrtare të klubit, ku falënderon lojtarin për kontributin e dhënë.
“Klubi i Futbollit Partizani 16-të herë kampion i Shqipërisë, falënderon mesfushorin Ardit Hila për kontributin e dhënë me fanelën e kuqe gjatë sezonit të tij të parë si pjesë e ekipit që u shpall kampion i vendit. Titullar në pjesën më të madhe të sezonit, Hila pati meritë në rikthimin e titullit pas 26 vitesh. Klubi informon se mesfushori 25-vjeçar dhe drejtuesit kanë vendosur të ndërpresin bashkëpunimin mes tyre për sezonin e ri. Klubi dëshiron të falënderojë lojtarin Ardit Hila dhe i uron njëkohësisht suksese të mëtejshme në karrierën e tij sportive”, thuhet në njoftimin e klubit.
Elbasanasi kaloi një sezon e gjysëm në kryeqytet, ku luajti 25 takime duke shënuar dhe 1 gol.
