Një sherr për borxhin e drogës është bërë shkak për përkeqësimin e konfliktit, e për rrjedhojë edhe të përdorimit të armës, duke i marrë jetën një 25-vjeçari. Autori i vrasjes së 25-vjeçarit Xhuliano Bullari në Vlorë, është arrestuar në ‘Bllok’ në Tiranë, ndërsa policia zbuloi se armën e kishte groposur në oborrin e shtëpisë.
Uniformat blu vunë në pranga sot autorin e dyshuar të ngjarjes, 39-vjeçarin Bledar Selmanaj, banues në Vlorë, i cili u arrestua në zonën e ‘Bllokut’. Autori dhe viktima kishin njohje me njëri-tjetrin, dhe ishin nisur nga Tirana për në Vlorë për çështje trafiku droge, ndërsa konflikti mes tyre ka nisur për shkak të një borxhi që Bullari i kishte Selmanajt.
Si ndodhi vrasja?
Debati mes palëve ka agravuar dhe në një çast, Selmanaj ka nxjerrë armën dhe ka qëlluar tre herë në drejtim të Bullarit, ku një plumb e kapi të riun në kokë, duke i marrë menjëherë jetën. Pas krimit, sipas policisë, Selmanaj ka shkuar në banesën e tij në lagjen “15 Tetori” në Vlorë, duke groposur në oborr edhe armën e krimit. Arma, tip pistoletë, dhe një krehër me nëntë fishekë, u gjetën sot nga policia. Po ashtu janë sekuestruar edhe disa veshje, të cilat dyshohen se janë përdorur nga autori gjatë vrasjes, si dhe një aparat celular.
Kamerat në hyrje të Vlorës
Për hedhjen dritë të ngjarjes, ndihmuan kamerat në hyrje të qytetit të Vlorës, ku u kapën pamje të automjetit tip ‘Fiat Punto’ me të cilin lëvizën viktima dhe autori, nëpërmjet të cilave u identifikua edhe 39-vjeçari Selmanaj.
I riu Xhuliano Bullari u gjet i vdekur nga banorët e zonës mëngjesin e 21 gushtit, rreth orës 07:35, në aksin Vlorë-Babicë, në një makinë tip ‘Fiat Punto’ me targa TR 3437 R. Sipas ekspertizës mjeko-ligjore, 25-vjeçari dyshohet se kishte ndërruar jetë rreth orës 21:00 të mbrëmjes së 20 gushtit.
Bullari, nga Elbasani, u qëllua tre herë me pistoletë nga krahu i pasagjerit, por një plumb e kapi në kokë, duke i shkaktuar vdekjen e menjëhershme.
39-vjeçari ‘hajdut serial’, vidhte sende nëpër banesa dhe i shiste në dyqane
Bledar Selmanaj, 39-vjeçari i arrestuar sot si autor i vrasjes së Xhuliano Bullarit, ngjarje e ndodhur 4 ditë më parë në Babicë të Vlorës, rezulton emër i njohur për policinë. Ai është dënuar në vitin 2012 për një sërë vjedhjesh, që i kryente në qytete të ndryshme të vendit, Tiranë, Vlorë e Fier. Sendet e vjedhura, 39-vjeçari i shiste më pas nëpër dyqane.
