Pas hetimit në të tri kriteret e rivlerësimit, Komisioni i Pavarur i Kualifikimit vendosi shkarkimin e prokurores së Tiranës Eriselda Bala. Kryesuesja e trupës Suela Zhegu tha se vendimi i shkarkimit ishte marrë me shumicë votash.
Balës iu kërkuan shpjegime në lidhje me një pagesë 48 mijë euro përmes bankës, për të cilën prokurorja tha se ishte falsifikuar firma e saj në faturën e pagesës.
Po ashtu asaj iu kërkuan shpjegime mbi 2 milion lekë të ardhura nga familja e bashkëshortit dhe një dhuratë 1 milion lekë nga gjyshërit e saj. KPK tha se kishte zbuluar një pagesë 48 mijë eurosh të bërë në emër të Balës nga një bankë përmes një kësti të vetëm. Në dëshminë e dhënë para KPK-së, një përfaqësuese e kompanisë kishte pranuar se pagesa ishte bërë nga kompania për të mbuluar detyrime të brendshme.
Bala tha se nuk kishte pasur dijeni për pagesën në bankë dhe se e kishte mësuar pas hetimit nga KPK. Ajo tha se menjëherë kishte bërë kallëzim penal për falsifikim dhe se një ekspertizë e kërkuar prej saj kishte provuar se firmat ishin të falsifikuara.
Bala e ka filluar karrierën si magjistrate në Prokurorinë e Rrethit Gjyqësor Vlorë në vitin 2008, dhe një vit më vonë është transferuar në Prokurorinë e Rrethit Gjyqësor Pogradec. Në vitin 2015 ajo është emëruar si prokurore në Prokurorinë e Rrethit Gjyqësor Tiranë.
