I hoqën titullin kampion bote, McGregor: Do jem pas jush si hije

Ai është kthyer në qendër të vëmendjes, pas atij debutimi që bëri në boks duke dalë jashtë stilit të tij të të luftuarit. Kampioni irlandez i arteve marciale mikse Conor McGregor, i shpallur kampion bote në peshat e lehta, pas një shkëputje prej më shumë se një vit duket se ka vendosur të rikthehet në kafaz. Titulli kampion iu hoq pa dueluar, pasi ai nuk kishte pranuar ta mbronte atë asnjëherë deri sot. Hera e fundit që ai zhvilloi një ndeshje ishte vjet në 26 gusht ku debutoi në boks, ku u mund me “KO teknik” nga Floyd Mayweather, duke lënë të hapur idenë për t’u rikthyer sërish në ring nëse vjen një ofertë e mirë.

Më 7 prill do të zhvillohet eventin e UFC-223, ku do të duelojnë Tony Ferguson dhe Khabib Nurmagomedov për të marrë titullin kampion që iu hoq McGregorit. Ky i fundit me anë të një postimi në rrjetet sociale është shprehur: “Unë do të jem kudo, do të jem gjithnjë pas jush, si hije”, ndërkohë që ndodhet në vendlindjen e tij, ku dhe po stërvitet për një rikthim të mundshëm në kafaz. McGregor ka deklaruar se nuk ka ndërmend të rikthehet për oferta qesharake, ndërkohë që të gjithë shpresojnë për një duel të tretë me Nate Diaz, për të kompletuar triologjinë mes dy ikonave të UFC-së (secili ka nga një fitore).