Policia e Tiranës ka parandaluar një ngjarje të rëndë, ku një konflikt për motive pronësie mes dy vëllezërve mund të ishte kthyer në një ngjarje tragjike.
Burime nga policia bëjnë me dije se pas informacionit të marrë për një konflikt mes dy personave, u bë i mundur arrestimi në kohë i Shkëlqim Suloavdulaj (Luli), 36 vjeç, banues në fshatin Baldushk.
Sipas hetimeve të deritanishme, ky person dyshohet se për motive pronësie është konfliktuar dhe ka kanosur me armë zjarri vëllain e tij L.L., 48 vjeç.
Grupi hetimor në vendngjarje ka sekuestruar në cilësinë e provës materiale një armë zjari tip pistoletë së bashku me një krehër me 6 (gjashtë) fishekë.
Gjithashtu gjatë kontrollit në banesë iu gjetën dhe sekuestruan në cilësinë e provës materiale dhe 18 fishekë luftarakë.
Materialet proceduriale i kaluan Prokurorisë pranë Rrethit Gjyqësor Tiranë për veprat penale “Mbajtja pa leje e armëve dhe municioneve luftarake”, dhe “Kanosja”.
