Gjykata e Posaçme e Apelit për Korrupsionin dhe Krimin e Organizuar ka lënë në fuqi masën e sigurisë “arrest në shtëpi” për Florida Beun. Kjo e fundit e cila është nën hetim në të njëjtën dosje me ish-zëvendësministren Rovena Voda, akuzohet për “ushtrim të ndikimit të paligjshëm”.
Florida Beu i dha ryshfet ish-zëvendësministres për një vend pune në Ministrinë e Brendshme. Nga hetimet e SPAK, rezultoi se Voda kishte marrë një mijë euro, një celular dhe një arkë me peshk për të punësuar Florida Beun në ministri. Nga dosja rezultoi se Voda ra në “rrjetën” e SPAK nga përgjimet që SPAK kishte nisur për prokurorin e Kukësit, Edmond Karriqi, i cili u arrestua në Kavajë nën akuzën e “korrupsionit”. Nga hetimet e kryera nga SPAK, nga përgjimet rezultoi se Rovena Voda ka pranuar nga avokatja Florida Beu një mijë euro, një telefon dhe një arkë me peshk për punësimin e saj në Ministrinë e Brendshme, por që në fund procedura mbeti në mes.
Zbardhja e përgjimeve
Sipas dosjes hetimore, Majlinda Hasani ka luajtur rolin e sekseres për të lidhur Florida Beun me ish-zv.ministren. Mes tyre zhvillohen një mori bisedash në lidhje me temën në fjalë, të cilat ndodhën në dosjen e SPAK. Por edhe pse Florida Beu aplikoi në disa vende në ministri, nuk arriti që të fitonte.
Marrja e eurove dhe të mirave materiale janë filmuar
Marrja e eurove dhe të mirave materiale janë filmuar, përgjuar dhe fotografuar nga SPAK, ndërsa ato janë marrë në momente të ndryshme dhe jo të gjitha njëherësh.
Florida Beu aplikoi për pozicionin Specialiste në 3 Ministri
Sipas dosjes së SPAK, në përgjimin e bisedave mes Beut dhe Majlinda Hasanit, rezulton se aplikimi do të bëhej për pozicionin “specialist” në tre Ministri, përkatësisht në Ministrinë e Brendshme, Ministrinë e Drejtësisë dhe atë të Financave. Beu nuk rezulton fituese në asnjë prej pozicioneve të punës ku ajo ka aplikuar në administratën shtetërore. /Tirana Today
