Elvana Gjata nuk preferonte të dilte shpesh në intervista. Madje, intervista e saj me Ermal Mamaqin, i cili është edhe një ndër miqtë e saj të vjetër, bëri shumë bujë.
Kjo edhe për shkak të misterit që ajo barte në vetvete. Këngëtarja donte që famën e saj ta justifikonte me punën, me këngët, me projektet e saj muzikore.
Por teksa jeta e saj ishte mjaft e vrullshme, këngëtarja tentonte të shfaqte të mirat materiale me anë të fotove. Ndjekësit çdo ditë e më shumë çuditeshin me lëvizjet e saj, udhëtimet me avion privat, veshjet të stiluara posaçërisht për të.
Prej dy vitesh ajo kishte mbajtur të fshehtë lidhjen, duke mos lënë asnjë media që të ndërhynte tek jeta e saj personale.
Lidhja e Elvana Gjatës me Ervin Matën shpërtheu pas ngjarjes së rëndë në ish-Bllok. Deri më tani dihet shumë pak për Ervin Matën, përveçse vjen nga një familje e pasur.
Spekulimet janë të shumta. Fillimisht u përfol se sherri kishte ndodhur për shkak të ngacmimit të Elvanës, e më pas u përfol për pazare droge.
Vetë kryetari i opozitës, Lulzim Basha, e ka përforcuar këtë teori, duke thënë se Ervin Mata është takuar me Saimir Tahirin në Gjermani. Por Ervis Martini, një nga të plagosurit nga ngjarja, thotë se Ervin Mata është thjesht një “dele”.
“Ervin Mata është një dele. Ai tani do të jetë në një copë dhomë, duke pirë. Unë s’kam asnjë lloj konflikti me të, por do të flas me babin e tij, dhe do i them të vijë të sqarojë. Ai ka frikë se mos ngel në burg, se ju e arrestoni, e mbani kot”, u shpreh Martini.
