Napoli këtë sezon ishte shumë pranë triumfit në Serie A dhe në javën e fundit e humbën shpresën. Mbrojtësi i kombëtares shqiptare që luan për napolitanët, Elseid Hysaj ka pranuar se çështja e titullit për Napolin është tashmë e mbyllur. Megjithatë ai ka sulmuar arbitrat për këtë. Sidomos në ndeshjen Inter-Juventus. “Të them të drejtën të gjithë besonim te titulli, pas ndeshjes së fituar në Torino ndaj Juventusit.
Në atë mbrëmje treguam se ishim shumë më të mirë se kundërshtari, duke i mbyllur në gjysmëfushën e tyre bardhezinjtë. Gjithsesi, teksa shikonim një javë më vonë sfidën Inter-Juve, dhe ato gabime të arbitrave, u ndjemë shumë keq dhe humbëm besimin se mund të bënim përmbysjen e madhe. Mendoj se pikërisht ajo mbrëmje ishte vendimtare në përcaktimin e fituesit në luftën për titull”, u shpreh Hysaj.
Hysaj më pas bëri një vlerësim të përgjithshëm për ekipin dhe kërkoi që lojtarët të qëndrojnë të gjithë që vitin tjetër të bëjnë më mirë. “Jam shumë i bindur te cilësitë e lojtarëve të Napolit. Nëse vijojmë të qëndrojmë të gjithë, por edhe me ndonjë përforcim, besoj se vitin e ardhshëm do të bëjmë akoma më mirë, për ta fituar titullin sa më shpjet të jetë e mundur”, përfundoi anësori shqiptar.
